英超：曼联笑迎谢菲联

英超争四向来好睇过戏，嚟紧礼拜四凌晨就会有一场事关前四嘅关键战役，梦剧场主人曼联将迎战今季冒起嘅锡菲联。 

　　复赛后唔开心嘅球队有唔少，锡菲联绝对会系其中一个。喺英超停摆前，佢哋一度7轮联赛抢足14分(4胜2和1负)，但赛季重启之后嘅两轮联赛，锡菲联和负各1场并且均交白卷。与此同时，今季防守威力震慑英超嘅锡菲联喺上轮联赛更加输波又输人，惨吞纽卡素三蛋之余，中坚约翰艾根更加染红离场，从睇到杀入联赛前四嘅希望，到如今复赛后连续失分，锡菲联将士嘅心态显然出现咗问题。

　　而对于曼联嚟讲，佢哋嘅开心时刻应该要从中场大将般奴费南迪斯加盟开始计起。喺冬季成「魔」之后嘅6场联赛中，呢位葡萄牙球星不仅带领曼联保持不败(胜和各3场)，而且佢个人期间亦贡献3波同3次助攻，渐露梦剧场新一代揸Fit人嘅潜质。另外仲有一个好消息就系法国中场普巴嘅及时「苏醒」，喺上轮对阵热刺嘅比赛中，喺下半场后备上阵嘅普巴发挥亮眼，只要佢能够继续生生性性，曼联嘅胜算自然更大。

　　喺人脚方面，曼联只有两个后卫连迪路夫和菲尔锺斯因伤避战；而锡菲联今仗就麻烦得多，除咗约翰艾根要坐波监之外，正选门将D.亨达臣又因为回避条款是役只能够做观众。

　　值得留意嘅系，锡菲联联赛至今只有2场失波达到3波，上轮对阵纽卡素系一次，另外一次就系首循环对阵曼联。